सातारा शहर ऐतिहासीक शहर आहे. या परिसारातील अनेक घटक हे आपले वेगळेपण राखून आहेत. ते सर्वच सातारचे मानबिंदू आहेत. यातील काहींनी आपल्या अस्तित्वाने सातारचे नाव उंचावले आहे, देशभर केले आहे अशाच काहींची अल्प प्रमणात माहिती देण्याचा प्रयत्न केला आहे....

प्रवाशांच्या सेवेसाठी हे ब्रीद वाक्य प्रत्यक्षात आचरणात आणत असलेले सातारा एस. टी. स्टॅण्ड सातारचा एक मानबिंदू ठरतो. महाराष्ट्रातील एक नंबरचे एस.टी. स्टॅण्ड म्हटले तरी वावगे ठरणार नाही. एस.टी. स्टॅण्डला आवश्यक असणारा विस्तीर्ण भूभाग, नियोजनपूर्ण रचना, प्रवाशांना मिळणारी सेवा, सातारा शहराच्या मध्यभागी अशा सर्वच बाजूने सातारा विभाग सातारा बसस्थानक उजवे ठरते. महाराष्ट्राच्या कानाकोप-यात सातारामधून एस.टी. नियमीत वेळेत धावते. आधुनिकतेचा स्विकार करीत प्रवाशांसाठी विविध योजना अस्तित्वात आहेत. त्यामध्ये काही रकमेत महाराष्ट्रात आवडेल तिथे प्रवास, विना वाहक, ऑनलाईन रिजर्व्हरेशन, कर्मचारी वर्गाची विनम्र सेवा ही सातारा आगाराची वैशिष्ट्ये.

सातारा शहर देशात येथील सैनिक स्कूलमुळे ओळखले जाते. सशस्त्र सैन्यामध्ये समाजातील आर्थिक दृष्ट्या दुर्बल वर्गातील युवकांना राष्ट्रीय संरक्षण प्रबोधिनीकरीता शैक्षणिक, बौद्धिक आणि शारिरकदृष्ट्या तयार करणे या दूरदृष्टीने महाराष्ट्राचे पहिले मुख्यमंत्री स्व. यशवंतराव चव्हाण यांच्या प्रयत्नाने सातारा सारख्या ऐतिहासिक जिल्ह्यात 23 जुन 1961 रोजी देशातील 24 अशा सैनिक शाळा श्रृंखला पैकी पहिली सैनिक शाळा स्थापन झाली. या शाळेचे उद्घाटन भारताचे संरक्षण मंत्री कै. व्ही. के. कृष्ण मेनन यांनी केले होते.  येथील अनेक विद्यार्थ्यांनीं राष्ट्रीय संरक्षण प्रबोधिनीमध्ये प्रवेश मिळवला आहे.

सातारा शहराची सांस्कृतीक ओळख म्हणजे सातारा नगर वाचनालय आणि श्री शाहु कलामंदीर अशी देता येते. साता-यातील अनेक सांस्कृतीक कार्यक्रम शाहु कलामंदीर येथे होत असतात. या मंदिराने महाराष्ट्रभर गाजलेल्या अनेक नाट्यप्रयोगांचा श्रीगणेशा पाहिला आहे. नाट्यसृष्टीतील अनेक दिग्गज कलावंताच्या कलेचा आस्वाद या कलामंदीराने सातारकरांना दिला आहे. आधुनिक काळातही शाहु कलामंदीरने सातारा शहारातील रसिक जागृत ठेवला आहे. श्री शाहु कलामंदीर हे ख-या अर्थाने कलेचे मंदीर आहे आणि ते रसिक सातारकरांच्या मनात पुजले जात आहे जात राहणार आहे.